សម្ដេចតេជោក្រើនរំលឹកដល់អាជ្ញាធរចុះជួយបូមទឹកសង្គ្រោះស្រូវរបស់ប្រជាពលរដ្ឋ
ភ្នំពេញ ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានៅព្រឹកថ្ងៃទី ៧ខែធ្នូ ឆ្នាំ ២០១៥ នេះ បានសរសេរនៅក្នុងបណ្ដាញទំនាក់ទំនងសង្គមFacebook ក្រើនរំលឹកដល់អាជ្ញាធរគ្រប់លំដាប់ថ្នាក់អោយចុះជួយបូមទឹកដើម្បីសង្គ្រោះស្រូវរបស់ប្រជាពលរដ្ឋដែលបាននឹងកំពុងប្រឈមនឹងការខ្វះខាតទឹក។
សម្ដេចតេជោបានលើកឡើងថា “កសិកម្មឆ្នាំនេះ ពិសេសដំណាំស្រូវទាំងស្រូវវស្សា ទាំងស្រូវប្រាំងបាននិងកំពុងប្រឈមនឹងការខ្វះខាតទឹក។
ក្នុងសភាពការណ៍បែបនេះជាមួយនិងវិធានការដែលរាជរដ្ឋាភិបាលបានដាក់ចេញរួចមកហើយនោះសម្ដេចបានរំលឹកលើចំណុចខ្លះៗ រួមមាន៖”។
អាជ្ញាធរត្រូវអន្តរាគមន៍ជួយបូមទឹកសង្គ្រោះស្រូវប្រជាពលរដ្ឋ ដោយមិនត្រូវទុកឲ្យស្រូវខូចនៅតំបន់ដែលមានប្រភពទឹកនោះឡើយ។កម្លាំងប្រដាប់អាវុធគ្រប់ប្រភេទ មន្ត្រីរាជការត្រូវចាត់តាំងកម្លាំងចុះជួយច្រូតកាត់ប្រមូលផលសំរាប់គ្រួសារដែលខ្វះកម្លាំងពលកម្ម (ចាស់ជរា ស្ត្រីមេម៉ាយជនពិការ គ្រួសារយុទ្ធជន)។
ស្ថាប័នកសិកម្មត្រូវផ្ដល់ពូជដំណាំដល់ប្រជាកសិករដែលមិនអាចធ្វើស្រែប្រាំងបាន ជំរុញឲ្យពួកគាត់ដាំដុះដំណាំរួមផ្សំវិញ។ត្រៀមអន្តរាគមន៍កំចាត់សត្វបំផ្លាញដំណាំ និងទប់ស្កាត់ជំងឺសត្វគ្រប់ប្រភេទ។
ស្ថាប័នហិរញ្ញវត្ថុ និងធនាគារត្រូវធ្វើការជាមួយស្ថាប័នមីក្រូហិរញ្ញវត្ថុដើម្បីរកវិធីអនុគ្រោះមួយចំនួនជូនប្រជាជនដែលរងគ្រោះ ដូចជាពន្យារពេលសងឬពន្យារពេលសងដោយមិនយកការប្រាក់ ឬបន្ថយការប្រាក់ទប់ស្កាត់ការឆ្លៀតឱកាសរឹបអូសដីធ្លី ផ្ទះសម្បែង ទ្រព្យសម្បត្តិពីសំណាក់ម្ចាស់បំណុល ចំពោះកូនបំណុលដែលកំពុងជួបការលំបាកដោយសារគ្រោះធម្មជាតិ ៕
This is the head of your page
